Day 5: 釧路湿原 (くしろしつげん) -- 帯広 (おびひろ) -- 新得 (しんとく)

一早七點鐘起身，伊藤太太已經準備咗每人一份好豐富嘅日式早餐俾我地。我好少食日式早餐，因為唔習慣晨咁早食飯，但呢份早餐又真係好窩心，因為諗起佢一腳踢，咁早起身又做咁豐富咁精緻嘅早飯，之後又帶我地划艇，咁盡心盡力照顧客人，所以食得好開心。

Check out之時先知原來韓國小姐已經喺五點鐘去咗划艇，伊藤夫婦真係落力。

收拾細軟，找埋數之後就出發去濕原划艇之行。整個行程加住宿每人¥13000，其實都頗合理。因為單單住宿費用都¥7000啦，而家加埋划艇同交通費，都係額外¥6000。嗱，留心以下個行程，因為時間夾得啱啱好，又唔太趕，又去哂應要去嘅地方。

八點鐘我地同伊藤夫婦各自開車到塘路站，泊好車我地就上埋伊藤架車到去一個河邊。落車後，伊藤先生就每人俾一件救生衣加一隻槳我地，咁著好就落一早泊好喺岸邊嘅小舟。

一行五人划艇，雖然人多，但都幾費力。我地先經過一個湖進入濕原，周圍都係樹木，湖面好平靜，好舒服。沿途我都有同伊藤太太傾計，佢話佢自己係喺釧路長大嘅，而後來嫁咗俾伊藤先生之後就住喺標茶町，攪咗旅館都好多年。而個仔就幫緊佢地去run個business，都幾好呀。又講吓藝能界啲人呀，日劇呀等等。佢地亦都好細心，原來帶備咗小冰箱，中途休息就請我地飲冰凍嘅咖啡，ichiban！撐撐吓發現動物，伊藤太太就叫我地靜啲，慢慢撐隻艇過去影相。

濕原出名嘅 Red Fox

仲見到鹿媽媽照顧緊小小鹿

記得喺伊藤家嘅guest room睇畫集嘅時候，睇到濕原嘅冬天原來好靚，除咗冰天雪地之外，仲多咗層霧，加添神秘感，影相發燒友可以發揮所長。不過我未必會揀冬天嚟，事關以往喺北海道行街，都未試過喺室外停留多過半個鐘，試問喺天氣更凍嘅道東，又點可以遊濕原呢，都係睇相開心啲。呢個都係點解無咁多遊客冬天到道東嘅原因之一。

差唔多兩個鐘嘅濕原划艇旅程到尾聲，我地喺濕原嘅另一方邊叫「細岡」嘅地方上岸，因為時間嘅關係，細心嘅伊藤先生已經喺呢度預備咗另一部七人Van等我地。上車之後伊藤先生就車我地去一個地方叫「細岡展望台」。

另一部七人Van已經一早預備好，停泊喺細岡

濕原周邊有好幾個展望台，而「細岡展望台」以視野良好、交通最方便而成為最受歡迎嘅展望台。企喺度就可以180度遠望濕原裡面迂迴曲折嘅湖道，以及遠遠阿寒嘅山脈。

當然唔會放過機會同咁nice，服務咁周到嘅伊藤夫婦合照啦。 Ito-san，本当にありがとう ~~

離開細岡展望台，我地差唔多時間要到細岡站坐Norokko列車返塘路站。中途架車停咗喺一間小屋門前，伊藤太太雞咁腳衝入去，以為佢人有三急。點知幾分鐘出嚟之後，原來佢拎住熱辣辣，黏黏嘅蒸甜薯送俾我地食，嘩，又一個感動位！

最後到達塘路站，終於要分手喇，fafa仲鞠咗個九十度嘅躬俾伊藤夫婦添。如果以後有朋友嚟釧路濕原玩想搵住宿介紹，我都會提議吓伊藤家。

釧路濕原Norokko號嘅班次唔算密，所以琴晚同伊藤太太夾好時間，我地一定要坐到十一點廿五分班列車返塘路pick up返我地架車。四月至六月上旬每日得一班次，六至九月就兩班，分別係十一點廿五同埋下晝三點卅三分。即係話，如果我地miss咗十一點廿五分呢班，一係等到三點幾，一係就give up坐Norokko喇。

等車其間，我地就慢慢享受熱辣辣，香噴噴嘅甜薯

上咗火車，雖然只係一個站，但都叫做坐到Norokko列車，從另一個角度去睇個濕原。喺車上睇濕原，點都唔及喺canoeing時感受咁深，咁親近。不過透過列車車窗遠望嘅景觀都好靚，仲欣賞到濕原迂迴嘅湖道。

車上遇到一個香港嚟嘅導遊，佢專門負責照顧國外遊客，同埋翻譯嘅工作。佢話好少見到香港嘅遊客，因為知道道東唔屬於熱門嘅旅遊地區。當然，佢都希望做多啲marketing，等人知道道東都有好玩嘅地方。其實都明嘅，夏季係最適合嚟北海道嘅時候，但呢個亦都係一家大細出動嘅機會，當然會搵一啲適合大人小朋友嘅地方，咁富良野，美瑛，旭川等就比較吸引啲，小朋友未必識得欣賞濕原呀，道東三湖呢啲山山水水嘅地方。

返到塘路，就繼續南下去下一個目的地 -- 釧路市。

釧路市我地只停留一個地方，就係出名嘅和商市場，以海鮮嘅質優量多而聞名。市場裡面有幾十間專賣海鮮嘅小舖，應有盡有。當然要特別推介呢個市場最有特色嘅「勝手丼」！「勝手」，日文係解隨意嘅意思。首先買一碗白飯，有唔同大小嘅size隨你選購。再拎住呢碗飯到唔同嘅攤檔揀自己鐘意食嘅海鮮，多少亦都係隨意。我地都係咁，呢檔買啲，嗰檔又買啲，整碗魚生飯有齊鮮帶子、甜蝦、三文魚、吞拿魚腩、海膽等，都係¥1680，唔夠食嘅，再買！

商店分佈圖

唔同品種嘅勝手丼小舖

選購好之後就坐低慢慢嘆，話哂係市場，所有裝潢嘅嘢欠奉，只有摺枱同摺凳

我冇揀毛蟹，但經過見到咁多膏，真係要影低佢

我嘅¥1680勝手丼，超值!

食飽飽之後就離開釧路市，向今晚嘅目的地新得進發。途經以黑豚肉出名嘅帶廣，我地見時間許可，於是就停一停低喺帶廣參觀一下。帶廣市本身唔係一個旅遊城市，但因為旅遊書介紹好味嘅豚丼都係喺帶廣，所以遊客好多都冒名而來。我地一心嚟食豚丼，但行行吓竟然見到「六花亭」咖啡店，原來呢間北海道著名嘅和果子製造公司總部都喺度！食完魚生飯，嘆返杯咖啡都好喎！

呢間「六花亭」總店除咗有coffee shop之外，咁梗係有賣和果子嘅專櫃。眼花撩亂，好「辛苦」先揀到想買嘅和果子。

我點咗杯Sumiyaki同埋Rich Vanilla雪糕

正所謂行得多，食得多，飲完咖啡冇耐我地行咗陣，發覺無乜特別，不如早啲食dinner。我地揀咗旅遊書上No1人氣嘅「元祖　豚丼のぱんちょう」。據資料表示，「豚丼」係於1933年，由元祖豚丼「ぱんちょう」嘅阿部秀司始創。由於當時豬比牛更容易喺北海道飼養，所以阿部秀司靈機一觸將豬嘅里肌肉用嚟炭燒，再加獨門醬汁，就創造咗「豚丼」喇！。嘅menu只有一種，分成華、梅、竹、松，而分別就只係碳烤豬肉嘅份量，基本上係同一樣嘢。「和味無窮」都有介紹過，所以好記得呢間店，而店小二婆婆都話成日有國內國外傳媒嚟採訪佢地添！

炭燒豬肉一啲都唔油膩，一口豬肉，一口醬汁撈飯，不得了！我而家諗起都刺激緊我嘅味覺神經，好想再次食返碗！

帶廣上新得大概四十五分鐘車程，到達Yorkshire Farm 差唔多八點幾，由於唔係市區，加上已經入夜，所以都唔係睇得好清楚旅館嘅模樣，只係隱約聽到羊嘅咩咩叫聲，好開心，因為知道自己置身係農場度。Yorkshire Farm嘅主理人帶我地到二樓嘅房間。我地間房係一間四人房，包括兩張單人床，加一個碌架床。