Book Pension Jacatra 時話明唔食早餐同晚餐，所以今朝就食琴日係新富良野酒店後面間bakery shop買定嘅麵包做早餐！不過我建議，如果住Pension Jacatra，真係要試吓佢個火鍋，因為好似好吸引咁！加上附近冇乜得食，可以唔駛好似我地咁，周圍搵食！
今日第一站就去美瑛JR站租單車。租車嘅地方係一間便利店，點門前泊咗好多單車，一定唔會miss。店長show咗俾我地睇應該點行法，要經邊啲花田，點樣返嚟之後，我地就出發！
路線其實有兩條，分別係景觀之路panorama同埋拼布之路patchwork。其實我都唔記得行咗邊條 (睇返啲路線圖，又好似panorama)，沿途經過好幾個小花田，但我地冇入。 呢段路頭段平路多，唔算難行，不過今日天氣實在太好，太陽又非常猛烈，所以都索哂氣，我地中途都停咗好幾次休息。
記得有一段路係直衝落斜路，嘩，好爽！ 之後有段路係大斜路上山，我地三個呆咗咁望住條路，點好呢，都要頂硬上，唯有不停用念力同自己講，上到頂就可以坐低休息嚟激發行埋呢段路。我本來堅持踩足全程，但中途都支持唔住，落車推咗一陣。至於我嘅隊友fafa同toto，一邊行，一邊媽媽聲，哈哈！
終於都山頂，見到四季彩之丘嘅入口！ 花田旁邊有間小木屋，原來係餐廳，我地決定午餐就喺呢度解決！
好骨子嘅小餐店，由三個嬸嬸主理。我地各自點咗食物，fafa嘅咖哩飯好有heart，事關真係心形。而我嘅和牛sandwich都ok！
嘆咖啡時見到有本guest book，toto 突然有感而發留底咗段說話。
午餐後又有一段小插曲，我上返架單車後預備離開，用超慢嘅速度行走，可能係石仔路嘅緣故，路面不平，我突然失咗平衡，成個人打側跌咗落地，嗰一刻覺得好痛，條褲穿咗小小窿，但前手臂位就係重災區，輕輕落地估唔到刮得咁深，件衫袖位穿哂，血流不止！ 好彩花田前有間shop，諗住實有膠布賣，點知冇！ 不過日本人都好好，cashier喺唔知邊度俾咗塊膠布我，但我傷嘅範圍實在太大，點都黐唔哂，唔緊要啦，已經唔係好痛，行埋個花田落山先算。
四季彩之丘原來好大，足足有三個東京巨蛋體育場咁大，全個花田有薰衣草、雞冠花、向日葵、羽扇豆、波斯菊等30唔同種類花種，呢度仲係位於美瑛景觀之路panaroma地區，可以眺望到大雪山。
回程途中
美瑛市歐陸式嘅街道非常乾淨，近火車站嘅建築好有歐洲風, 而每棟建築物上面都有刻咗建造年份。 一邊踩單車，一邊感受吓咁清新嘅空氣，手臂嘅痛楚都感覺輕咗。
還咗單車之後就走到便利店旁嘅一間藥房買膠布。我入到去，有個藥劑師婆婆問我要啲乜，咁我俾個傷口佢睇，佢好好，冇介紹我買邊啲藥，就立即俾咗啲藥膏搽傷口，先再叫我揀膠布買。
離開美瑛市，我地急不及待去下一個目的地，旭山動物園，路程大概都係三十分鐘左右。點解我地咁期待呢，就係因為可以見到係香港冇機會見嘅北極熊同企鵝喇！
今日天氣好靚，亦有啲熱，泊好車我地就由動物園嘅東門進入。
好可愛呀，呢隻北極熊好識show off，因為工作人員會續批續批遊客咁放入館，佢一見人多，而個個都將相機鏡頭對住佢嘅時候，就喺個玻璃邊游來游去，好enjoy咁表現自己，亦好proud咁多人咁近距離見到佢嘅驚心動魄嘅表情。
跟住到企鵝館，我都唔明天氣咁熱，話哂都有廿七八度，啲企鵝點可以出嚟啲露天嘅地方，仲要企咁耐呢？ 睇吓呢隻，個款係埋好招積？
旭山動物園嘅企鵝主要有四種：國王企鵝(King)，紳士企鵝 (Jentu)，漢堡特企鵝 (Humboldt) 仲有跳岩企鵝 (Rockhopper)。 原來企鵝好得意，無論老嘅嫩嘅，行路姿勢都係個頭搖吓搖吓咁，不知幾咁生鬼！ 見到佢地就不其然諗起Happy Feet套戲。
館裡面有一條通道向下走，其中一段係一條完全透明嘅玻璃隧道穿過水池底部，企喺度可以近距離睇見企鵝逍逍遙遙咁喺你頭頂游來游去。
嘩，熊出沒注意！
除咗北極熊，企鵝，同熊人館之外，當然都去過其他館啦，不過冇乜特別，所以冇用咁多篇幅去講。已經下晝四點，我地係時候出發去今晚住宿嘅地方 -- 阿 - 寒 - 湖。
好多身邊嘅朋友去北海道自駕遊，通常都係去道央 - 札幌，小樽，富良野，美瑛，最多去埋旭川。可能覺得好遠同埋怕冇咁多地方去。過咗呢個trip，我可以話成個旅程最好玩係而家開始。
由於今次車程都幾長，要四個幾鐘，所以要早啲起行，費事夜媽媽搵路。我地離開旭川前就梗係要試返個出名嘅旭川拉麵先啦！
呢程長途車都唔算悶，由旭川出發先經過city，可以睇吓旭川市嘅風貌。 大約個幾鐘頭之後建築物開始稀疏，車路就由幾條減到單線行車，由於有頗多大貨櫃車或者係行得超慢嘅車，好多時都要爬頭，其實都幾緊張刺激。沿途經過層雲峽，位於大雪山山麓，呢座大峽谷裡面佈滿高達100米左右嘅懸崖峭壁，都係凝灰岩受侵蝕後形成嘅地形。本來都想將層雲峽列入itin裡面，但plan落又冇咁多時間，而且景點都係睇吓瀑布之類，冇乜互動嘅項目，所以skip咗。今次經過都可以望到，景緻不俗。
差唔多夜晚八點幾到達阿寒嘅新阿寒酒店。樓高九層，我揀呢間酒店除咗佢近碼頭方便第二日坐船同埋近遊客街之外，就係睇中佢頂樓嘅空中溫泉！
由於八點幾，外面嘅食肆都收哂爐，而原來我地幾booking又包埋buffet dinner，咁梗係貪方便啦，於是我地行李都未放上房，check in完就急不及待食咗buffet dinner先喇。確實啲食物都唔差！
呢個係我今日嘅代表作
酒店有兩部份，分別係Shangri La同埋Crystal Tower，我地被安排住Crystal Tower。 發覺房間唔算好新淨，有輕微甩皮甩骨，不過唔係好嚴重。間格有啲似Niseko嘅Hirafutei，四正房間加一個小小露台。打開窗簾，well，黑漆漆，乜都睇唔到，淨係睇到樹葉。
收拾一輪之後，我同fafa決定進攻幾個大浴場！ 酒店有好幾個浴場，而我地就揀咗九樓嘅「雲海」同「天舞」，而溫泉邊又有另一條樓梯通到頂層嘅露天風呂「月見の湯」同「花見の湯」！ 可能太夜而且呢兩個露天風呂都接近關閉時間，人唔多，其實咪就係得我地兩個！不過咁夜其實冇乜景睇到，所以都冇stay太耐。
一身裝束浸溫泉去，佢地低頭研究緊近排好興嘅齋油腳趾公新油法，都係唔明點解會成為潮流。
4:40 PM |
Category: |
0
comments
Comments (0)