一早起身，梗係再去浸多一次溫泉。原來室外仲有幾個露天溫泉，每個含有嘅物質都唔同，溫度唔同，可以醫治唔同嘅病痛。執好行裝大概九點就出發出富良野。
toto今日係司機，沿途落山，藍天白雲，靚得不得了，香港已經幾耐冇見過咁靚嘅天色呢！
經過好幾個花田，唔知係咪未到最盛放嘅時候，都未見到五顏六色好壯觀嘅花田。朝早九點多，街上人都唔多個，於是就揀咗一間餐廳食早餐。我地要咗兩個rice，一個係curry omlette，原來係富良野頗出名嘅食品之一; 另外一個係omelette rice，都好好味。呢間 La Mail 雖然細小，但都非常精緻，有一個外藉女子駐場，原來係英文教師！ 佢除咗喺coffee shop幫手之外，亦會開班教英文添 ~~
時間差唔多要開始我地嘅花田遊，第一站係富良野最大最出名,位於中富良野町嘅富田農場 Farm Tomita。呢個農場係以大面積的薰衣草花田聞名。
眼前就係一大片紫色嘅薰衣草田 - 倖之花田 - 由濃紫早開、丘紫、羊蹄、花藻岩等4種顏色不同嘅薰衣草結合而成嘅花田。雖然做research或者睇書呀，旅遊節目呀見得多，但真係聞名不如見面，非常壯觀！ 你會話，一片紫色嗟，有幾靚呀？！我諗壯觀嘅意思唔係淨係講花田，係包括咗花，環境，天氣等等。今日所有東西加埋就係一幅壯觀嘅圖畫喇。
薰衣草田側面就係其他花卉嘅田 - 花人之田，其實呢個唔算係開花最靚嘅時候，但都會見到一啲好靚嘅構圖。有加州罌栗、姬金魚草、金盞花等色彩繽紛嘅鮮花。
一輪謀殺部相機嘅memory之後，就坐底休息。我地三人買咗薰衣草雪糕試吓，話哂喺薰衣草園冇理由唔試吓咁特色嘅雪糕嘛！ 食咗兩啖，大家你眼望我眼，味道咁熟悉嘅，oh，好似屋企用開個支lavendar handcream囉。 大家試咗少少就冇再食。
後來我地買咗有名嘅melon同埋用melon做嘅雪糕，先滿足啲呀，因為真係好味道。
離開富田農場，下個花田係彩香之里。呢個花田冇富田咁大，最主要栽種薰衣草，品種多達七種，另外仲有羽扁豆花、向日葵同埋多種色彩繽紛嘅花。fafa同toto好似懶懶地，所以坐咗喺度，而我就去咗呢個花田其中一個session摘薰衣草，佢地畫咗一部份，俾遊客自由摘花，其他花田通常都要俾錢先可以摘。
摘完薰衣草都冇乜其他景觀，所以決定去下一個花田，上富良野嘅Flowerland。
呢度係屬於富良野地區少數要收費入場嘅花園，大人 500日圓 / 兒童 200日圓。Flowerland位於上富良野較高嘅地勢，所以可以望哂整個富良野町地區嘅田野美景。Flowerland被喻為係花期最長嘅花田，裡面種咗薰衣草、向日葵、一串紅、百合花、波斯菊同埋罌粟花十多種唔同嘅花種。唔想行咁多路，都可以坐園內嘅觀光巴士穿插其中都得。
離開Flowerland，我地返轉頭，落返富良野，先向富良野 Wine Factory進發。富良野葡萄酒工場位於清水山山坡上。喺葡萄酒工場裡面你除咗可以參觀葡萄酒嘅歷史文物,仲可以參觀葡萄酒裝瓶嘅過程, 可以話係一個小型嘅葡萄酒博物館。見識過葡萄酒的製作過程, 仲可以試飲100%富良野地產嘅葡萄酒。 而工場外面嘅平地又可以睇到十勝岳連峰，真係幾靚！
而酒工場附近就係下一個目的地，富良野芝士工房。芝士可謂係北海道嘅特產之一，有謂冇北海道，就冇日本芝士。原於1933年，日本嘅北海道製酪(即係而家嘅雪印）最先研製出做芝士嘅配方，之後越做越大，形成咗日本人食芝士嘅潮流。芝士工房入場費都係全免，仲有唔同種類嘅芝士任試任食。
La Mail嘅早餐之後其實都冇乜食嘢（除咗中途又食melon，又食雪糕之外），喺芝士工房地面層就有pizza工房。我地用vending machine買咗mini pizza食，頂住個肚先。Pizza即叫即做，仲係用傳統炭爐焗製，特別脆口。
食完pizza，我地再南下，到富良野New Furano Prince Hotel後面嘅Ninguru Terrace。Ninguru Terrace係倉本聰監督所設計構築而成嘅森林遊步道。喺森林裡面散步嘅同時, 你仲可以參觀林間25間風格各不相同嘅手工藝品小木屋。小木屋所販售嘅手工藝品全部都係僅此一家, 別無分號嘅獨家商品!
我之前嚟過，不過都係冬天，記得有一年我地book咗Niseko滑雪，但係當時就咁啱係北海道所謂嘅大災難 -- 唔夠雪！所以Niseko間酒店仲未開。咁我地即刻搜索附近其他有開嘅滑雪場，就搵到富良野呢度。冬天嘅Ninguru Terrace好唔同，每間屋仔前面都有唔同嘅裝飾，好似雪人，聖誕燈飾等。不過最有印象同最掛住就係ChuChu House嘅Yakimilk，即係燒鮮奶。呢個亦都係我一定要返嚟嘅主要原因。其實呢杯奶係用北海道地道鮮奶加熱再放焦糖，最後用火好快咁燒吓面層。到而家我仲記得佢嘅味道係點，唔知下次再飲會係幾時呢？
接落嚟就返去再收集我已經擁有五件嘅「森の楽団」成員。今次買咗一個打鼓嘅樂手，好開心！ 我諗冇乜機會會儲齊整對band，不過我或者阿力每到一次Ninguru Terrace，都會收集一個成員做紀念！
Pension Jacatra 係位於美瑛一個小山坡上，外型真係唔錯。泊好架車，我地入去check in，喺check in嘅簿仔度發現今晚嘅guest都幾多香港人！我地被安排咗住二樓嘅一間三人房，都係要自己舖tatami，無所謂啦！ 安置好我地就周圍參觀影相！全層二樓嘅房客都係share一個洗手間，不過唔駛擔心，喺日本，點都係非常乾淨嘅！我知三樓係有套房，兼有按摩椅添。講明半budget trip，雖然唔會刻薄自己，但亦唔會太浪費。沖涼地方仲搞笑，係喺室外嘅一間屋仔度，仲要排隊輪候。到地下大廳，主要係飯堂，見到staff開始擺放餐具預備晚餐，有爐頭添，嘩，原來係火鍋呀！ 最衰我地無book到晚飯，唯有迫住落山搵嘢食！
室外嘅浴室小屋
到外面草披地，有張木枱，木凳，再行遠啲有個韆鞦，遠望就係美瑛市嘅花田。七月初雖然未係花開得最靚嘅季節，但遠望一片綠色嘅草田，加埋啱啱日落，坐喺韆鞦上搖吓搖吓，都咪話唔舒服！我地三個童心未泯咁玩咗一陣，就預備出城搵食。
我地喺travel guide睇到間食日本西餐嘅，就決定去試吓。不過入到去明明有位，都要等三十分鐘喎，日本人好唔識諗通，你點講都唔會改變佢地嘅做事方式，咁我地唯有搵第二間。試過喺街捉個路人甲問，佢又唔知指咗我地去邊，最後我地再靠travel guide搵咗間食燒烤嘅，咁梗係醒目打咗電話book枱先啦。店主好nice，佢都識啲英文，由於menu上嘅肉類都分好幾種，好似我地打邊爐嘅牛都有分雪花肥牛，牛頸脊，牛展咁啦，所以老板娘都幫我地去點菜。
返到pension好多guest都去哂休息，咁我地快快趣三個一齊沖涼去。臨休息前我地喺門前嗰張木枱坐咗一陣, 由於附近無建築物，加上天色好清，我地見到滿天星星，阿toto老師仲教我地睇邊粒係乜嘢星座添。
今日做咗好多嘢，係時候早啲休息喇。之不過 ~~~ 我啱啱瞓喺牆邊，而隔離房個大叔嘅鼻鼾勁滋擾!!! 我唯有搵我個friend itouch引我入睡 ~~~
4:41 PM |
Category: |
0
comments
Comments (0)